प्रतिपक्षी दल राष्ट्रिय स्वतन्त्र पार्टी (रास्वपा) का सांसद मनिष झाले खेलकुद क्षेत्रमा बिचौलियाको प्रवेश भएको बताएका छन्। उनका अनुसार, जनकपुरधाममा निर्माणाधीन खेलकुद मैदानको वार्षिक भाडा एक्कासि बढाइएकाले त्यहाँ पनि बिचौलियाको प्रवेश भएको हो।

सांसद झाले बिहीबार प्रतिनिधि सभा बैठकको शून्य समयमा बोल्दै भने, खेलकुद परिषदले गुठी संस्थानलाई वार्षिक ९ लाख रूपैयाँ तिर्थ्यो, त्यसका लागि हामीले अहिलेसम्म ४ करोड खर्च गरिसक्यौं। तर एक्कासि के कारणले त्यसको भाडादर ४९ लाख ६० हजार बढाइयो। यसमा समृद्ध बिचौलिया, समृद्ध दलाल छिरेजस्तो छ।

उनले जनकपुरको लक्ष्मीकुटीको नाममा रहेको १७ बिघा जमिनमा डिपिआर गरेर साढे २ अर्बको अन्तर्राष्ट्रिय रंगशाला परिकल्पना भएको अवस्थामा रोकिने अवस्था आएको पनि बताए। सांसद झाले चेतावनी दिँदै भने, यदि जनकपुरको युवाहरूको त्यो क्रिकेट रंगशालाको परिकल्पना र खेलाडीहरूको सपनामा कुनै व्यवधान भयो भने चाँडै आन्दोलन हुनेछ। यस घटनाले खेलकुद क्षेत्रमा पारदर्शिता र इमानदारीको आवश्यकता पुनः उजागर गरेको छ।