काठमाडौं — एक दर्दनाक विमान दुर्घटनामा भारतको अहमदाबादबाट लण्डनका लागि उडेको एयर इन्डियाको बोइङ ७८७–८ विमान खस्दा २४१ जनाले ज्यान गुमाएका छन्। यो घटना बिहीबार दिउँसो भएको हो। विमान उडेको केही मिनेटमै दुर्घटनाग्रस्त भएको पुष्टि भारतीय गृहमन्त्री अमित शाहले गरेका छन्। उनका अनुसार, विमानमा कुल २४२ जना सवार थिए — २३० यात्रु र १२ जना चालक दलका सदस्यहरू।

दुर्भाग्यवश, एक जना बाहेक सबैको मृत्यु भएको छ। बाँच्न सफल ती यात्रु भारतीय मूलका बेलायती नागरिक हुन्, जसको उपचार हाल एक अस्पतालमा भइरहेको छ। गृहमन्त्री शाह स्वयं घटनास्थल पुगेका थिए। पत्रकारहरूसँग संक्षिप्त कुराकानी गर्दै उनले भने, “सवा लाख लिटर इन्धनका कारण आगलागी निकै भीषण थियो। अधिकतर शवहरू पहिचान गर्न कठिन भएका छन्, र त्यसका लागि डीएनए परीक्षणको सहारा लिइनेछ।

दुर्घटनाग्रस्त विमान टाटा समूहको स्वामित्वमा रहेको एयर इन्डिया अन्तर्गत सञ्चालनमा थियो। कम्पनीले मृतक यात्रुका परिवारलाई प्रति व्यक्ति एक करोड रुपैयाँ राहत दिने र घाइतेको सम्पूर्ण उपचार खर्च ब्यहोर्ने घोषणा गरिसकेको छ। साथै, दुर्घटनाबाट क्षति पुगेका घरहरूको पुनर्निर्माण पनि टाटाले गर्ने जनाएको छ।

यो दर्दनाक घटनामा गुजरात राज्यका पूर्व मुख्यमन्त्री विजय रुपाणीको पनि निधन भएको पुष्टि केही प्रमुख भारतीय मिडिया हाउसहरूले गरेका छन्। अन्तर्राष्ट्रिय प्रतिक्रियाको कुरा गर्दा — अमेरिका, बेलायत, क्यानडा, नेपाल, पाकिस्तान, बंगलादेश, माल्दिभ्स लगायत देशका राष्ट्रप्रमुख र सरकारहरूले गहिरो दुःख व्यक्त गरेका छन्। भारतका राष्ट्रपति र प्रधानमन्त्रीले दुर्घटनालाई राष्ट्रीय पीडा भनेका छन्।

हाल घटनास्थलमा अनुसन्धान कार्य जारी छ। प्रारम्भिक जानकारी अनुसार प्रविधिगत समस्या वा उडानको क्रममा भएको आपतकालिन अवस्थाले दुर्घटना निम्त्याएको हुनसक्ने आशंका गरिएको छ। विस्तृत अनुसन्धानपछि मात्र ठोस निष्कर्ष आउनेछ।